Rencana Membangun Persinggahan di Ambarita

PARSADAAN POMPARAN AMBARITA RAJA & BORUNA (PPARB)
KOTA MEDAN DOHOT HUMALIANG
Sekretariat : Jl. Akasia II No. 22, Sutomo Ujung Medan, Hp. 081362348446

Nomor : 01/02-PPARB/2008
Lamp. : -
Hal : Sangkap tu Bona Pasogit Ambarita


Mandapothon Napinarsangapan :
1. Sude Pomparan Ambarita Radja dohot Boruna Na adong di Desa na Ualu / Portibi on.
2. Sude Punguan/Parsadaan Pomparan Ambarita Radja dohot Boruna na adong di Indonesia on.

Horas ma di hita saluhutna,

Hami sian Pomparan ni Ompungta Ambarita Radja & Boruna, ima na tergabung di "Punguan Pomparan Ambarita Radja dohot Boruna (PPARB) Medan dohot Humaliang, ro pasahathon hata horas-horas tu hita saluhutna namarhaha maranggi/ marhula-hula marboru, manang didiape hita maringanan.

Punguan Pomparan ni Ompung ta Ambarita Medan, nungnga jonjong 44 taon lelengna, jala dibahen ma goarna Parsadaan Pomparan Ambarita Radja Dohot Boruna Medan dohot humaliang, manang dipajompok ma goarna PPARB.

Dung adong marpulu taon punguan i, godang angka pandapot manang usul - usul nadenggan sian angka hita , beha asa boi hita nian pajumpang di sada inganan, laho pajumpang bohi dalan marsitandaan, laos pasombu sihol huhut marsirarion, angka aha ma sitaringotanta laho patimbulhon hita Ambarita, asa boi nian minimal setara dohot angka punguan marga ni donganta halak Batak.

Di ari naung salpu nunga hea ditaringoti piga-piga gagasan na laho patupahon:

1. Tanda manang Ruma Parsinggahan ni Hita Pinompar ni Ambarita Raja.

Nunga hea ditaringoti (taon 2003) di bona ni pasogit Ambarita, aha ma nanaeng sipatupaon na laho mambahen sada "Tanda" di Bona Pasogit Ambarita, na gabe ugasan manang milik ni sude hita pomparan ni Ompungta Ambarita Radja. Hira dos do tahi ditingki i, naeng mambahen sada Sopo manang Ruma, disamping gabe "Tanda" i, boi muse gabe persinggahan ni hita pomparan ni Ompungta, lumobi ma angka pangaranto na so haru diboto be didia huta ni ompungna di Ambarita. Di na deba Punguan Marga, dibahen nasida do Tugu manang Tambak songon tanda parsadaan nasida, alai di hita adong do poda sian bona pasogit na mandok naso denggan hita patupa Tugu manang Tambak di Ambarita.

Ala ni i, naeng ma berbentuk Sopo manang Ruma, na boi pangkeon ni hita.
Jadi, taringot tuson, naeng ma jaloon pendapat manang usul sian hita sude:

a. Beha do rumang ni sopo manang ruma on behenonta. Ninna roha naeng ma nian boi i pergunahonon ni hita sude molo ro hita tu Bona Pasogit.
b. Didia do lokasi na dumenggan, jala na boi dapot hita.
c. Aha do goar ni sopo manang ruma on bahenonta.
d. Taringot tu dana na ringkot na laho pengadaan ni sopo/ruma i.

2. Lagu manang Ende Parsadaan ni Ambarita
Songon na patimbulhon marganta , bahenonta ma nian sada Ende namanggombarhon turi-turian manang tarombo ni marganta Ambarita. Molo ende on, pos do roha nami tu hita namaringanan di Jakarta, nasida ma nian pasauthon tahinta on, ai adong do piga-piga pomparan ni ompungta na di Jakarta na dilehon Tuhanta talenta laho mencipta lagu. Molo goar ni lagu i boi ma ra MARS AMBARITA bahenonta, manang na dia ma nasuman ninna roha ni Pencipta lagu i.

3. Gorga manang simbol ni Puanguan Ambarita Radja dohot Boruna.
Asa adong nian sada songon gorga / simbol ni Punguan Ambarita dohot Boruna, pinangido tu hita na adong dilehon talenta laho mambahen i. Di simbol manang gorga i asa digombarhon ma anak ni Ompungta nadua i, jala parserakni hita mulai sian Huta Ambarita Pulo Samosir sahat tu desa na ualu / portibi on. Gorga manang simbol on ma nian bahenonta di kop surat di punguan ni marganta di ari namangihut muse, asa seragam sude.

Mardomu tu sangkap ni rohanta on, pinangido ma tu sude hita, asa rade be rohanta membahas isi ni surat on di ingananta be, dohot dipunguanta be, asa adong bahan siboanon ni perwakilan tu rapot nanaeng sipatupaonta.

Husangkapi rohanami do naeng mambahen pertemuan di taon on, paling lambat ma nian sahat tu pertengahan ni taon 2008 on. Na ro tu pertemuan i angka perwakilan tiap-tiap inganan ma nian dohot pribadi na taronjar rohanan. Ia tempat pertemuan naeng ma nian di Bona Pasogit Ambarita.

Songon i ma jolo hata nami, na maringanan di Medan nahumaliang, jala hami pe tongtong do rade manjalo/manolopi saran / pandapot, manang usul na dumenggan.

Disiala pangantusion, dohot diharadeon ni rohanta mamingkirhon usul / pangidoan manang sangkap ni rohanta on, jumolo ma hupasahat hami godang mauliate.

Dohonon ma tutu songon na nidokni hata ni Ompungta Sijolo-jolo tubu:

Napuran Tano-tano, Urat nai rangging marsironggongan
Nang pe Badan ta padao-dao, Alai tondi / tahinta , sai tong tong manian marsitomuan.

Horas ma hita sude,

Medan, Februari 2008

A/n. Parsadaan Pomparan Ambarita Radja dohot Boruna
Medan dohot Humaliang

Ketua Umum Sekretaris I


Ttd. Ttd.

Dipl.-Ing. ASM. Ambarita Drs. J.M. Ambarita

Dohot manolopi:
Penasehat :
1. Ir. A.B. Ambarita
2. BD.Ambarita
3. Drs. J.Ambarita MPd.
4. A. Parulian Ambarita

Ketua I: DM Ambarita
Ketua II: V. Ambarita
Ketua III: St. OR Ambarita

Sekretaris I : Drs. J.M. Ambarita
Sekretaris II: Ir P. Ambarita
Sekretaris III: Drs T. Tambunan

Dohot sude Pengurus

Alus sada ni rohanta dipasahat ma tu alamat na di toru on:
1. Alamat Sekretariat songon na di kop surat on.
2. Dipl.-Ing. ASM. Ambarita, Kompl. TASBI, Blok SS No. 45, Medan (20133), Tel. 0811649250 Email : amerson@indo.net.id
3. DM. Ambarita, Jln. Bunga Wijaya Kesuma (KLINIK AMBAR) No.87 Medan, Tel. 061-8213961

NB: Laos pinangido tu sude hita namanjalo surat on, asa dipasahat copy ni surat on tu
angka donganta na so manjaha surat on dope, Mauliate ma.